मंडळी इंडियन ऑईलने एलपीजी सिलिंडरच्या दरात बदल केले आहेत. आज १९ किलो वजनाच्या व्यावसायिक एलपीजी सिलिंडरच्या दरात १७ रुपयांपर्यंत घट करण्यात आली आहे. यामुळे विविध शहरांमध्ये या सिलिंडरची किंमत कमी झाली आहे. कोलकात्यात १८६८.५० रुपयांऐवजी १८५१.५० रुपये, मुंबईत १७१३.५० रुपयांवरून १६९९ रुपये आणि चेन्नईत १९२१.५० रुपयांऐवजी १९०६.५० रुपये होईल. दिल्लीतील १९ किलोच्या व्यावसायिक सिलिंडरची किंमत १७४७.५० रुपये असेल.
घरगुती एलपीजी सिलिंडरचे दर अद्याप कायम आहेत. दिल्लीत १४.२ किलोचा सिलिंडर ८५३ रुपयांचा, कोलकातामध्ये ८७९ रुपयांचा, मुंबईत ८५२.५० रुपयांचा आणि चेन्नईमध्ये ८६८.५० रुपयांचा मिळेल. घरगुती एलपीजी सिलिंडरच्या दरात ८ एप्रिल २०२५ रोजी ५० रुपयांची वाढ झाली होती, जी एक वर्षानंतर करण्यात आली. यापूर्वी १ एप्रिल २०२५ रोजी व्यावसायिक एलपीजी सिलिंडरच्या किंमतीत ४१ रुपयांची घट करण्यात आली होती.
देशात सुमारे ३२.९ कोटी एलपीजी कनेक्शन आहेत, ज्यापैकी १०.३३ कोटी कनेक्शन प्रधानमंत्री उज्ज्वला योजनेअंतर्गत दिले गेले आहेत. या योजनेअंतर्गत गरिबांना ३०० रुपयांपर्यंत सवलत मिळते. २०२५-२६ च्या अर्थसंकल्पात सरकारने एलपीजी सबसिडीसाठी ११,१०० कोटी रुपयांची तरतूद केली आहे. गेल्या वर्षी इंधन कंपन्यांना २२,००० कोटी रुपये देण्यात आले होते कारण त्या त्या वेळेस तोट्यात होत्या.
